राजेश साेनाम। कावासोती ।अहिलेको सरकार परमादेशबाट बनेको सरकार भएकाले जनताप्रति उत्तरदायी नभएको गण्डकी प्रदेश सभा सदस्य एवं नेकपा एमाले नवलपुर जिल्ला अध्यक्ष रोशनबहादुर गाहामगरले बताउनुभएको छ । अहिले काङ्ग्रेसको सरकारले हिजो केपी ओली नेतृत्वको सरकारले गरेका काम रोक्न बाहेक अन्य कामै नगरेको समेत उहाँले बताउनु भएको छ । अखिल नेपाल महिला संघ कावासोती वडा नम्बर २ ले आयोजना गरेको तीज विषेश कार्यक्रममा बोल्दै उहाँले नेपाली काङ्ग्रेस नेतृत्वको सरकार जनता प्रति उत्तरदायी नभएकाले जनताका पक्षमा एमालेको सरकारले गरेको काम रोक्ने बाहेक केही नगरेको बताउनुभयो ।
देशलाई विकास र समृद्धिको बाटोमा लैजना एमाले बाहेक अरु कुनै पार्टीले नसक्ने समेत अध्यक्ष गाहा मगरले बताउनुभयो । देशमा बिभिन्न पार्टी रहेको भएपनि देशकै ठूलो पार्टीका रुपमा रहेको एमालेले मात्रै यो मुलुकको विकासका निम्ति काम गर्ने उहाँले बताउनुभयो ।
गण्डकी प्रदेशमा एमालेको नेतृत्व हुँदा विकासका कयौं योजना अगाडि बढाएको स्मरण गर्दै अहिले काङ्ग्रेस सरकारले विकास भन्दा आफ्ना सीमित कार्यकर्ताका पकेटका योजनामा मात्रै बजेट बाँडेको आरोप लगाउनुभयो ।।
गत आर्थिक वर्षमा १६ करोड रकमान्तर गरि दुई चार लाख रुपैयाँका दरले कार्यकर्तालाई बाढेको तर एमालेको सरकारले थालनी गरेका ठूला क्रमागत योजनालाई त्यो भन्दापनि कम बजेट राखेको भन्दै काङ्ग्रेस विकास मुखी पार्टी नभएको आरोप लगाउनुभयो ।
कार्यक्रममा बोल्दै अध्यक्ष गाहा मगरले जिल्लामा पार्टीबाट अलग भएका नेता ,कार्यकर्तालाई फर्काउने प्रयास चलिरहेको समेत बताउनुभयो । एमाले पार्टीमा बसेर कामगर्ने गरि अहिले अलग रुपमा बसेका सबैलाई फर्काउने कोसिस भएको बताउनुभयो । उहाँले नवलपुरमा एमाले एकतावद्ध भएर मजबुत रुपमा अगाडि बढ्ने समेत बताउनुभयो ।
तीज विषेश कार्यक्रममा संविधान सभा सदस्य एवं जिल्ला सचिव जिवन श्रेष्ठ, जिल्ला सचिवालय सदस्य विष्णु प्रसाद भुषाल सहित बाबुराम विक, भिमलाल कँडेल, सिता खड्का , पूर्व क्षेत्रिय कमिटी सदस्य लक्ष्मी सापकोटा , नगर कमिटी अध्यक्ष विष्णु प्रसाद ढुङ्गाना, वडा नम्बर २ का वडा अध्यक्ष लक्ष्मी प्रसाद पौडेल लगाएको उपस्थिति रहेको थियो । कार्यक्रममा बोल्दै वक्ताहरूले तीजको शुभकामना राख्दै एमाले पार्टी जनताको पार्टी र विकासलाई गति दिने पार्टी भएको बताएका थिए ।
कार्यक्रम अनेमसंघ वडा अध्यक्ष रुमति आलेको अध्यक्षतामा भएको थियो ।
