कालिगण्डकी नदीमा निर्मित पुलमा क्षति, बौदीकालीको फेरी सडक सम्पर्क टुट्यो

डेढगाउँ । अविरल वर्षाका कारण बौदीकाली गाउँपालिका डेढगाउँ स्थित कालिगण्डकी नदीमा निर्माण गरिएको पुलमा पुनः क्षति पुगेको छ । बौदीकाली गाउँपालिका डेढगाउँ र मानपुर जोड्ने कालिगण्डकी नदीमाथि निर्माण गरिएको पुलमा क्षति पुगेको हो । सवारी साधन वारपार हुन नसक्ने गरि पुलमा क्षति पुगेसँगै बौदीकालीको सडक सम्पर्क टुटेको छ । नवलपुरको बजार क्षेत्रमा आउने सडक यस अघिनै पानीले क्षति पुर्याई यातायात सञ्चालन हुन सकेको छैन् । कालीगण्डकी नदीको पुलमा समेत क्षति पुगेपछि तनहूँसँगको समेत सडक सम्पर्क टुटेको हो । यसअघि समेत सो पुलमा बाढीले क्षति पुर्याउदा बौदीकालीको बजारक्षेत्रसँगको यातायात सम्पर्क टुटेको थियो ।

पुलको तनहूँतर्फको भागमा क्षति पुगेको बौदीकाली गाउँपालिकाका प्रमुख प्रशासकीय अधिकृत प्रदिपचन्द्र सुवेदीले बताउनुभयो । पुलको तनहूँतर्फको भागको विङ्ग वाल नदीले कटान गरेकाले पुल भएर यातायात सञ्चालन गर्न नमिल्ने भएकाले आवागमन बन्द भएको उहाँले बताउनुभयो ।
पुलमा क्षतिपुगेकाले सवारी साधन र पैदल दुवै किसिमले आवतजावत नगर्न समेत प्रमुख प्रशासकीय अधिकृत सुवेदीले अनुरोध गर्नुभएको छ ।पुल मर्मतकालागि सरोकारवालासँग समन्वय भइरहेको उहाँले बताउनुभयो ।

आकस्मिक सेवाकालागि सम्बन्धित वडा कार्यालय ,इलाका प्रहरी कार्यालय वा गाउँपालिकामा सम्पर्क गर्न समेत प्रमुख प्रशासकीय अधिकृत सुवेदीले अनुरोध गर्नुभएको छ ।अविरल वर्षाका कारण गाउँपालिकामा रहेका खानेपानी आयोजना, सडक ,पुल लगायतका संरचनामा पूर्ण रुपमा क्षति पुर्याएको प्रमुख प्रशासकीय अधिकृत सुवेदीले बताउनुभयो ।