अपडेट : हुप्सेकोटमा पहिरोमा परि वेपत्ता हुनेमा हजुरआमा र नातिनिहरु

हुप्सेकोट । नवलपरासी (बर्दघाट सुस्तापूर्व )नवलपुरको हुप्सेकोट गाउँपालिकामा पहिरोमा परि तीन जना वेपत्ता भएका छन् ।
अविरल वर्षाका कारण गएको पहिरोमा परेर हुप्सेकोट गाउँपालिका ४ माथिल्लो चार घरेका तीन जना बेपत्ता भएका हुन् । पहिरोमा परि बेपत्ता हुनेमा एकै परिवारका रहेका छन् ।
हुप्सेकोट गाउँपालिका ४ का अध्यक्ष रोशन थापाका अनुसार बेपत्ता हुनेमा हस्त बहादुर पुलामीका श्रीमती धनमाया पुलामी, नातिनीहरू भुमिसार पुलामी र देउमाया पुलामी रहेका छन् ।

हस्त बहादुर पुलामीको भने गम्भिर अवस्थामा उद्धार गरिएको वडा अध्यक्ष थापाले बताउनुभयो । सुरक्षाकर्मीको टोली अहिले घटना स्थलमा पुगेको र बेपत्ता भएकाहरूको खोजीकार्य भइरहेको उहाँले बताउनुभयो ।
पहिरोका कारण सोही स्थानका पदम बहादुर पुलामी घरमा समेत क्षति पुर्याएको वडा अध्यक्ष थापाले बताउनुभयो । अविरल वर्षाका कारण माथिल्लो चार घरेका १७ घर पहिरोको जोखिममा परेका छन् । अविरल वर्षाका कारण सोही वडाको शंखदेवमा समेत एक घरमा क्षति पुगेको उहाँले बताउनुभयो । वडाका विभिन्न स्थानमा पहिरोले सडकमा क्षति पुर्याएको वडा अध्यक्ष थापाले बताउनुभयो ।
यसै गरि लेकाली युवा क्लबको फुटबल ग्राउण्ड समेत गिरुवारी खोलाले बगाएको छ । वडामा बाढीले खेती योग्य जमिनको कटान र डुबान गरेको उहाँले बताउनुभयो । शंखदेव र नयाँगाउँ जोड्ने पुलमा समेत बाढीले क्षति पुर्एको वडा अध्यक्ष थापाले बताउनुभयो ।