यातायात कार्यालय नवलपुरबाट फरक प्रदेशका सवारी नवीकरण रोकिँदा सेवाग्राहीलाई समस्या 

नवलपुर । यातायात व्यवस्था कार्यालय नवलपरासी (बर्दघाट सुस्तापूर्व) नवलपुरबाट फरक प्रदेशका सवारीको कर संकलन र नवीकरण रोकिँदा सेवाग्राहीलाई समस्या भएको छ । भौतिक पूर्वाधार ,शहरी विकास तथा यातायता व्यवस्था मन्त्रालय गण्डकी प्रदेशबाट फरक प्रदेशका सवारी साधनको कर संकलन र नवीकरण सम्बन्धी परिपत्र नआएपछि  यातायात व्यवस्था कार्यालयले फरक प्रदेशका सवारीको कर संकलन तथा नवीकरण कार्य रोकेको छ । कर संकलन र नवीकरणको काम रोकिएपछि यस क्षेत्रका सेवाग्राही भने समस्यामा परेका छन् ।
मन्त्रालयबाट फरक प्रदेशका सवारीको कर संकलन र नवीकरणकालागि  परिपत्र नआएकाले कावासोती स्थित कार्यालयबाट गण्डकी प्रदेश बाहेकका अन्य प्रदेशमा दर्ता भएका सवारीको कर तथा नवीकरणकार्य रोकिएको यातायात व्यवस्था कार्यालय नवलपुरका प्रमुख ज्ञान प्रसाद भुसालले बताउनुभयो ।
मन्त्रालयबाट अघिल्ला वर्षहरूमा सवारी धनीको ठेगाना गण्डकी प्रदेश रहेकाहरूका सवारी दर्ता अन्य प्रदेशमा भएको भएपनी कर संकलन र नवीकरण हुँदै आएको थियो । तर अहिले यस आर्थिक वर्षकालागि मन्त्रालयले कर संकलन र नवीकरण यथास्थितिमा गर्न भनी कुनै पत्राचार नगरेकाले आफूहरूले फरक प्रदेशमा दर्ता भएका सवारीको कर संकलन र नवीकरण रोकेको कार्यालय प्रमुख भुसालले बताउनुभयो । ‘हामीलाई प्रत्ययक वर्ष कर संकलनका लागि मन्त्रालयबाट पत्र आउथ्यो , सोही आधारमा सवारी धनीको ठेगाना गण्डकी प्रदेशमा भएका तर सवारी दर्ता अन्य प्रदेशमा भए पनी नवीकरण गर्ने काम गर्थ्यौँ ’ यातायात व्यवस्था कार्यालय नवलपुरका प्रमुख भुसालले भन्नु भयो–अहिले यस्तो परिपत्र आएको छैन्, यसले गर्दा अन्य प्रदेशमा दर्ता भएका सवारीको कर संकलन र नवीकरण कार्य रोकेका छौं । अहिले गण्डकी प्रदेशबाट दर्ता भएका सवारीको मात्रै कर संकलन र नवीकरण  गरिएको उहाँले बताउनुभयो ।
यता फरक प्रदेशका सवारीको कर संकलन र नवीकरण रोकिँदा सेवाग्राही भने समस्यामा परेको गुनासो गरेकाछन् । यस क्षेत्रमा अधिकाम्स  बाग्मती, लुम्बिनी , नारायणीबाट दर्ता भएका सवारी सञ्चालनमा रहेका छन् । ती स्थानबाट सवारी दर्ता भएका सेवाग्राही अहिले अन्यत्र कर बुझाउन जानुपर्दा समस्या सिर्जन भएको उनीहरूको भनाई रहेको छ । नवलपुरको कार्यालयले नवीकरण नगर्दा अब अन्यत्र जानुपर्दा समस्या हुने स्थानीय निरोज सिंञ्जालीले बताउनुभयो । ‘मेरो ठेगाना नवलपुरकै छ, सवारी नारायणीमा दर्ता भएको छ, अब यहीबाट हुने काम वीरगञ्ज जानुपर्ने भएको छ ,यसले धेरै समस्या पार्यो’ सिंञ्जालीले भन्नुभयो ।
‘कर सहज रुपमा तिर्ने बनाउनुपर्ने हो , जहाँको कार्यालयले लिएपनि राज्यकै अङ्ग हुन, प्रविधिको यो समयमा पनि यती अप्ठ्यारो बनाएर जहाँको दर्ता हो त्यही जा भन्नु ठिक  भएन’ अर्का सवारी धनी पे्रम कुमार ठकुरीले भन्नुभयो ।
यातायात व्यवस्था कार्यालय नवलपुरका प्रमुख भुसालले भने आफूहरूले यस विषयमा कर संकलन र नवीकरणकालागि अनुमति दिन पत्राचार गरिसकेको बताउनुभयो । ‘हामिले सेवाग्राहीका समस्या बुझेका छौ, पत्राचार समेत सम्बन्धित निकायमा गरेका छौं’ कार्यालय प्रमुख भुसालले भन्नुभयो– सायद चाडै यस विषयमा निकास आउने छ , अघिल्ला वर्षहरूमा जसरी कर संकलन र नवीकरणकालागि निरन्तरता दिनु भने हामी तत्काल कार्य गर्छौ ।