भक्तपुर । नेकपा एमालेका अध्यक्ष केपी शर्मा ओलीले नेकपा एमाले कर्कलोको पातमा अडेको पानीजस्तो पार्टी नभएको बताएका छन्। एमाले कमजोर नाजुक शक्ति नभएको उनले बताए। नेपाली पुगेका ठाउँमा एमाले पुगेको पनि उनले बताए।
‘एमाले विरोधी षड्यन्त्र आफैँ समाप्त हुनेछ। उनीहरूले डेढवर्ष गरेर खाँदैनन्। सरकार चार जना मन्त्री लिएर हिँडेको छ,’ ओलीले भने। राजनीतिक दल सम्बन्धी अध्यादेशमा २० प्रतिशत भए पार्टी विभाजन गर्न सक्ने गरी ल्याइएकोमा उनले विरोध गरेका छन्। केन्द्रीय समिति र संसदीय दलमा २० प्रतिशत भए दल विभाजन गर्न सक्ने गरी अध्यादेश आएको थियो।
यो अध्यादेशअनुसार एमाले नेता माधवकुमार नेपालले एमाले समाजवादी पार्टी बनाएका छन्। दर्ताका लागि बुधबार निर्वाचन आयोगमा निवेदन दिएका छन्। ओलीले त्यसतर्फ संकेत गर्दै आफूहरू लाग्ने हो भने नेपालका पक्षमा १० प्रतिशत पनि बाँकी नरहने बताए।
भक्तपुरमा आज विशेष सम्बोधन गर्दै उनले एमाले खरानीको डल्लो नभएको पनि बताए। ‘प्रतिक्रियावादी शक्तिले सोचेका थिए एमालेलाई ध्वस्त र कमजोर तथा खत्तम पार्न सकिन्छ भन्ने सोचेका थिए। तर एमाले कर्कलाको पातको पानीजस्तो होइन हावा चल्नेवित्तिकै झरोस्,’ उनले भने।
ओली नेतृत्वमा चुनाव भए दुई तिहाइ ल्याउँछ भनेर गठबन्धनले सरकार बनाएको पनि ओलीको दाबी छ। उनले सुदूरपश्चिम र कर्णालीमा बहुमत भए पनि एमालेको सरकार नबनेको बताएका थिए। एमालेकै सांसदले फ्लोर क्रस गरेपछि एमालेको मुख्यमन्त्री नभएको उनले बताए।
