वैदेशीक रोजगारीमा ठगिका घटना बढी

कावासोती ।  वैदेशीक रोजगारी सम्बन्धी सबैभन्दा बढी ठगिका घटना हुने गरेको पाईएको छ ।
पूर्वी नवलपरासीका चार स्थानीय तहसंगको सहकार्यमा हिमालयन सामुदायिक विकास मञ्च हिकोडेफ मार्फत् सञ्चालन गरिएको सुरक्षित आप्रवासन परियोजना (सामी ) परियोजनाले सार्वजकि गरेको तथ्याङ्क अनुसार जिल्लामा सबैभन्दा बढी ठगिका मुद्दा दर्ता हुने गरेको छ । तर , ठगिका घटना समाधान भने निकै कम हुने गरेको छ ।
आईतबार कावासोतीमा आयोजना गरिएको पत्रकार सम्मेलनमा परियोजनाकी परामर्शदाता रञ्जना लम्सालले तथ्याङ्क सार्वजनिक गर्दै चालु आर्थिक वर्ष २०७७÷०७८ मा मात्रै दर्ता भएका १२५ वटा मुद्दा मध्ये ठगिमा परेको ७८ वटा मुद्दा दर्ता भएको बताउनुभयो । जसमध्ये ३१ वटा मात्रै समाधान भएको छ । ३६ लाख २२ हजार ठगबाट असुल उपर गरिएको छ । परियोजना सुरु भएदेखि हालसम्म ठगिका १ हजार १२८ वटा दर्ता भएका छन् । जसमध्ये ५६६ उजुरी समाधान भएको छ । २ करोड ८० लाख ८७ हजार २ सय रुपैया पीडितले क्षतिपूर्ति पाएका छन् । परिवारका आफन्त,नजिकका नातेदारबाट नै ठगिका घटना बढी हुने भएकाले ठगीका घटनाका दोषीलाई पीडित आफैँले कारवाही प्रकृयामा लैजान नखोज्ने लम्सालको भनाई छ । जसले गर्दा अझैपनि ठगि भइरहेको उहाँ बताउनुहुन्छ । खाडी मुकुकमा १० हजार रुपिँयामा मात्रै लैजानुपर्ने नियम लागु भएपछि पछिल्लो समय खाडी मुलुक भन्दा बढि युरोप देशहरुमा लैजाने भनी ठगी गर्ने गिरोह सकृय भएको उहाँले बताउनुभयो ।
लम्सालका अनुसार चालु आर्थिक वर्षमा दर्ता भएका १२५ वटा मुद्दा मध्ये मृत्युको ११ मुद्दा दर्ता भएको थियो । अघिल्लो वर्षको समेत २० मृत्युका मुद्दा समाधान भएका छन् । जहाँबाट ३ करोड १२ लाख ३२ हजार क्षतिपूर्ति र दुर्घटनाका ५ मुद्दामा ३ समाधान हुँदा ७ लाख क्षतिपूर्ति पीडित परिवारले पाउन सफल भएका छन् । चालु आर्थिक वर्षमा सम्पर्क विहीन भएको भन्दै ८, जेलमा रहेको ६, विरामी भएको ८, कोरोना प्रभावित ४,कागजजात नभएको ३ र घरेलु कामदार समस्यामा ३ वटा उजुरी दर्ता भएको लम्सालले बताउनुभयो ।
नवलपुरको कावासोती , देवचुली र गैंडाकोट नगरपालिका तथा बिनयी त्रिवेणी गाउँपालिका गरेर चार स्थानीय तहमा परियोजना अन्तरगतका कार्यक्रम सञ्चालन गरिएको भए पनि सबै स्थानीय तहका घटनाहरुमा काम गर्ने गरिएको लम्सालले जानकारी दिनुभयो ।
हिकोडेफका कार्यकारी निर्देशक कृष्ण घिमिरेले परियोजना संचालन पश्चात वैदेशीक रोजगारीमा जानुअघि शिक्षा दिने, सीप सिकाउने, ठगि,मृत्यु,हिँसा, अन्य विभिन्न समस्यामा परेकालाई उद्दारमा सहयोग गर्ने,वैदेशीक रोजगारीले हुने मनोसामाजिक समस्यामा परामर्श गर्ने,विदेशबाट भएको कमाईलाई सहि सदुपयोग गर्न सिकाउने आदि काम गर्दै आइरहेको बताउनुभयो । परियोजनाले अहिले विषेशगरि वित्तीय साक्षरतालाई प्राथमिकतामा राखेको उहाँ बताउनुहुन्छ । विदेशबाट पठाएको रकम कसरी कम भन्दा कम खर्च गरेर धेरै बचतगर्ने , बचत गरेको रकम कहाँ कसरी प्रयोग गर्ने भन्ने जस्ता शिक्षा दिन थालेपछि नेपालमा बसेका परिवारले विदेशबाट पठाएको रकमको विभिन्न आयआर्जनको क्षेत्रमा लगानी गर्ने गरेको उहाँले बताउनुभयो ।
नेपाल सरकार र स्वीस सरकारको द्धिपक्षिय समझदारी अनुसार श्रम,रोजगार तथा सामाजिक सुरक्षा मन्त्रालय तथा स्थानीय तहहरुको समेत नेतृत्वमा हेल्भेटास नेपालको प्राविधिक सहयोगमा यो परियोजना संचालित छ ।