ढलान गर्न तयारी गरिएको निर्माणाधीन पक्की पुल बाढीले बगायो

कावासोती। पूर्वी नवलपरासीको बौदीकाली गाउँपालिका वडा नं. १ र २ जोड्ने बौदीखोलामामा आएको बढीले पक्की पुल बाढीले बगाएको छ ।
बौदीखोलामा आएको बाढीले ढलान गर्न तयारी अवस्थामा रहेको निर्माणाधीन पक्की पुल बगाएको हो । वडा नं. २ का अध्यक्ष बालप्रसाद ठाडाले दिनुभएको जानकारी अनुसार उक्त पुल मंगलबार ढलान गर्ने भनी सबै तयारी गरिएको थियो । ३५ मिटर लामो उक्त पुल गत फागुन महिनामा गण्डकी प्रदेशका तत्कालीन भौतिक पूर्वाधार विकासमन्त्री रामशरण बस्नेतले शिलान्यास गर्नुभएको थियो ।
गण्डकी प्रदेश सरकारको ३ करोड ५० लाखको लागतमा पुल निर्माण भइरहेको थियो । ढलानको काम मात्र बाँकी रहेका बेला बाढीले पुल बगाएको हो । वडा अध्यक्ष ठाडाका अनुसार करीब ९० लाख रुपिँयाको क्षती भएको छ । बौदीकालीकै डेढगाउँ र तनहुँ जोड्ने कालीगण्डकी नदीको पक्की पुल पनि बाढीले बगाएको छ ।
यस्तै पुल बगाएर खोलाको बीचमा हुँदा पानी ताल परेर वडा नं. १ को मिथुकरमको सेरा भन्ने स्थानमा रहेको करीब ५ बिघा क्षेत्रफल खेत बगाएको छ । बाढी पसेर खेत सबै कटान गरेर बगर बनाएको अध्यक्ष ठाडाले बताउनुभयो ।