मैनाघाटमा मध्यविन्दु पार्क एवम् स्तम्भ निर्माण हुदै

तिर्थराज डुम्रे ।

चोरमारा । नवलपरासी पूर्व नवलपुरको मध्यविन्दु नगरपालिका–१३ मैनाघाटमा पार्क निर्माणको काम अगाडी बढेको छ । मैनाघाटको बरपिपल पहाडमा संसद बिकास कोष र वडाको बजेटमा पार्क निर्माणको लागि आवश्यक पूर्वधार निर्माणको काम भइरहेको छ ।
विगतमा मध्यविन्दु नगरपालिकाबाट समेत बजेट विनियोजन भएर निर्माणको काम शुरु भएको मध्यविन्दु पार्क एवम् स्तम्भलाई पर्यटकिय गन्तव्यको रुपमा बिकास गर्न पूर्वधार निर्माणको काम भइरहेको वडा अध्यक्ष अर्जुन पंगेनीले बताउनुभयो ।
निर्माणधिन पार्क क्षेत्रबाट मैनाघाट, बसन्तपुर, गिरुवारी, झ्यालबास, चोरमारा, चितवन राष्ट्रिय निकुञ्ज क्षेत्र सहित नवलपुर र आसपासको विभिन्न क्षेत्रको अवलोकन समेत गर्न सकिन्छ ।
आर्थिक वर्ष २०७४÷०७५ मा मध्यविन्दु नगरपालिकाद्वारा विनियोजित नौं लाख रुपैयाबाट पार्क निर्माणको काम अगाडी बढेको थियो । त्यसपछि कुनैपनि क्षेत्रबाट आवश्यक बजेट विनियोजन नहुदाँ थप निर्माण कार्य हुन सकेको थिएन । केही समय नेपाली सेना मार्फत पार्क निर्माण हुने बिषय अगाडी बढेको भएपनि सो योजना त्यतिकै अलपत्र परेको थियो ।
अहिले निर्वाचन क्षेत्र पूर्वधार बिकास कार्यक्रम अन्र्तगत निर्वतमान सांसद तिलक महतद्वारा विनियोजित सात लाख रुपैया र वडाको भैपरी आउने खर्चबाट एक लाख रुपैया गरि आठ लाख रुपैया बजेट मार्फत पार्कको लागि दुई तहको बस्न मिल्ने गरि राउण्डमा वाल लगाउने कार्य भइरहेको वडा अध्यक्ष पंगेनीले बताउनुभयो ।
पार्कको डिपिआर नै तयार गरेर पर्यटकीय क्षेत्रको बिकासको लागि आफ्नो तर्फबाट मध्यविन्दु नगरपालिका, प्रदेश सरकार र केन्द्रीय सरकारसंग आवश्यक बजेट व्यवस्थापनको लागि पहल गरिरहेको बताउनुभयो ।
निर्माणधिन पार्क क्षेत्र विगतमा सो क्षेत्र भएर पैदल यात्रा गर्ने बटुवाहरुको भारि बिसाउने र रात काट्ने स्थानको रुपमा रहेको थियो । पूर्वी पाल्ला, उत्तरी नवलपुर र स्याङ्गजा सम्मका व्यक्तिहरुको त्रिवेणी नाकामा खाद्य सामाग्री खरिद बिक्रिको लागि सोही मार्ग भएर जाने गरेको पंगेनीले जानकारी दिनुभयो ।
महेन्द्रराजमार्गको चोरमाराबाट करिव सात किलोमिटर उत्तरमा रहेको पार्क क्षेत्र नगरपालिकाको पर्यटकिय क्षेत्रको रुपमा बिकास गर्न सकेको खण्डमा आन्तरिक ताथ बाह्य पर्यटकलाई अर्कषित गर्न सकिने पार्क निर्माण समितिका सचिव पाण्डव खनालले बताउनुभयो ।
हाल पिकनिक खानको लागि बिभिन्न स्थानबाट आउनेहरुको लागि एकवटा बस्ने ठाउँ र पानी तथा शौचालयको समेत व्यवस्थापन भइसकेको खनालले बताउनुभयो ।
पार्क क्षेत्र नजिकैको स्थानमा रक क्लामिङ्ग, प्याराग्लाइडिङ्ग सहितका साहासिक खेल सञ्चालनको समेत सम्भावना रहेको भन्दै उहाँले नगरपालिकाले गैरवको योजनाको रुपमा पार्क बिकासलाई अगाडी बढाउनुपर्ने बताउनुभयो ।
आवश्यक बजेटको सुनिश्चिता नहुँदा पार्क निर्माणको काम सम्पन्न हुन कति समय लाग्छ भन्ने अन्यौलता देखिएपनि पार्क सो क्षेत्रको पहिचानको रुपमा स्थापित हुने स्थानीयहरुको विश्वास रहेको छ ।