प्रतिबन्धीत धानको बीउ प्रयोगलाई रोक्न अनुगमन

कावासोती । गत वर्ष धानको बीउका कारण बाला नलाग्ने समस्या देखिएपछी जिल्लामा अहिले सर्तकता अपनाईएको छ । धानको बीउ राख्ने समय चलिरहदा नवलपरासी (र्बघाट सुस्तापूर्व) नवलपुरका एग्रोभेटहरुको अनुगमन गरिएको हो । स्विकृत धानको बीउ नहुँदा पछी समस्या पर्न सक्ने देखेर जिल्ला प्रशासन कार्यालय नवलपरासी पूर्व नवलपुरको नेतृत्वमा यहाँका एग्रोभेटको अनुगमन गरिएको हो ।
जिल्लाको कावासोती , देवचुली , गैंडाकोट र मध्यविन्दु नगरपालिका तथा बिनयी त्रिवेणी र हुप्सेकोट गाउँपालिकामा रहेका एग्रोभेट तथा बीउबीजन बिक्री गर्ने संस्थाहरुमा अनुगमन गरिएको सहायक प्रमुख जिल्ला अधिकारी मोहन बहादुर थापाले बताउनुभयो ।
‘अहिले बीउ जुन पायो त्यही राख्दा ,धानको बाला नलाग्ने लगाएतका समस्या देखिन सक्छ, यसले कृषको मेहनतपनि खेर जाने ,उत्पादन पनि घटेर कृषकले क्षती बेहोर्नुपर्ने हुुन सक्छ’ सहायक प्रमुख जिल्ला अधिकारी थापाले भन्नुभयो– प्रतिबन्धीत तथा स्वीकृत नभएका धानको बीउ बिक्री गर्न सक्ने हुँदा त्यसलाई रोक्न अनुगमन गरिरहेका छौं ।
अनुगमनका क्रममा जिल्लाको हुप्सेकोट , दुम्किवास , देवचुली लगायतका केही एग्रोभेटहरुले प्रतिबन्धीत र स्वीकृत नभएका धानको बीउ बिक्री वितरण गरेको पाईएपछि जफत गरिएको छ ।
यस क्रममा हुप्सेकोटको सुजल एग्रोभेटबाट १३ किलो प्रतिबन्धीत गोरखनाथ धान जफत गरिएको कृषि ज्ञान केन्द्र पूर्वी नवलपरासीका सुचना अधिकारी शंकर पौडेलले जानकारी दिनुभयो । उक्त एग्रोभेटले दुई बोरा गोरखनाथको बीउ ल्याएर अरु बिक्री गरिसकेको र बाँकी रहेको १३ किलो बीउ जफत गरिएको पौडेलले बताउनुभयो ।
बिनयी त्रिवेणीको सागर फिड एण्ड पोल्ट्री सप्लायर्स र किसान एग्रोभेटबाट ३८९ किलो प्रतिबन्धीत तथा स्वीकृत नभएका बीउ जफत गरिएको छ ।

यी एग्रोभेटबाट गोरखनाथ ५०९ , मोती गोल्ड , गोदावरी गंगा , जिके गंगोत्री , काँवेरी सोना , काँवेरी केपि १०८ जातकोे धानको बीउ जफत गरिएको लामिछानेले जानकारी दिनुभयो ।
देवचुली नगरपालिका रजहरको चौधरी एग्रो सेन्टर र मंगल भेट फर्माबाट गरि ३२० किलो सुपर सोना काँवेरी , बिपिपि ५२०४ जातको स्वीकृत नभएको धानको बीउ जफत गरिएको छ ।
अनुगमनका क्रममा अधिकाशं घरेलुमा दर्ता नगरेको , समयमा नविकरण नगरेको , बीउ र विषादीको स्वीकृती नलिकनै बिक्री वितरण गरेको , मुल्य सुचि नराखेको , ढक तराजु नविकरण नगरेको , प्रतिबन्धीत विषादी बिक्री गरेको , अन्तिम प्रयोग मिति नभएको पाईएको सहायक प्रमुख जिल्ला अधिकारी मोहन बहादुर थापाले बताउनुभयो ।