कावासोती । कावासोती नगरपालिकामा गरिबी निवारणका लागि लघु उद्यम विकास कार्यक्रम सञ्चालन गरिएको छ ।
कावासोती नगरपालिका वडा नं. १, २,१० र १७ नं. वडामा यो कार्यक्रम सुरु भएको छ ।
कावासोती वडा नं. २ ले पहिलो चरण अन्तरगत एक हप्ते तालिम बुधबार सम्पन्न गरेको छ । १८ गतेबाट सुरु भएको उद्यमशीलता विकास तालिम एवम् लैङ्गीक समानता तथा समावेशीकरण तालिम बुधबार सकिएको हो ।
तालिमको समापनमा बोल्दै वडा नं. २ का अध्यक्ष एवम् आर्थिक समिती संयोजक लक्ष्मी प्रसाद पौडेलले गरिबीको रेखामुनी रहेका परिवारका लागि स्थानीय श्रोत साधन र सीपको परिचालन गरी स्थानीय स्तरमा नै उद्यमशीलता विकास मार्फत् रोजगारी सिर्जना गर्ने उदेश्यले यो कार्यक्रम सञ्चालन गरिएको बताउनुभयो । उहाँले वडा नं. २ बजार क्षेत्रमा पर्ने हुँदा यो कार्यक्रम अन्य ग्रामिण क्षेत्रमा लैजानुपर्ने कुरा उठिरहदा आफुले बजार क्षेत्रमा पनि लक्षित समुदाय रहेको र उनीहरुका लागि यो कार्यक्रम आवश्यक छ भनि पहल गरेर कायक्रम वडामा ल्याउन सफल भएको बताउनुभयो ।
कार्यक्रममा सहभागि भएका लक्षित समुदायलाई उहाँले सरकारले गरेको लगानी कुनै पनि हालतमा खेर जान नदिनेगरि दत्तचित्त भएर तालिममा सहभागि हुन र व्यवहारमा लागु गर्न आग्रह समेत गर्नुभएको छ । यो कार्यक्रम बहुवर्षे कार्यक्रम भएको हुँदा केहि समय तालिम लिने र बीचमा छाड्ने काम नगर्न आग्रह गर्दै उहाँले निरन्तरता दिन अनुरोध गर्नुभयो । यस्तै उहाँले कार्यक्रमबाट सफल उद्यमी बनी स्वरोजगार भई समुदायमा उदाहरणीय बन्न समेत सहभागिलाई आग्रह गर्नुभयो । अन्यत्र समेत जान नदिएर २ नं. वडामा पहल गरेर ल्याएको यस कार्यक्रममा सहभागिहरुले राम्रो नतिजा दिन नसकेमा सबैलाई भन्ने बाटो हुने र आगामी दिनहरुमा यस किसिमका कार्यक्रम वडामा ल्याउन गाह्रो पर्ने उहाँको भनाई थियो ।
वडा नं २ मा मात्रै यस कार्यक्रममा ३२ जना सहभागि छन् । उनीहरुले समुह विभाजन गरेर बङ्गुर पालन ,बाख्रा पालन , भैँसी पालन र प्याकेजिङ्ग चार वटा व्यवसायलाई रोजेको उद्यम विकास सहजकर्ता अस्मीता नेपालीले जानकारी दिनुभयो । यी ४ वटा व्यवासय गर्न चाहानेहरुका लागि आउँदा दिनहरुमा निरन्तर रुपमा आवश्यक तालिम दिने , बीउ पुजीँ दिने , प्रविधी हस्तान्तरण गर्ने लगायतका कार्यक्रम गरिने नेपालीले बताउनुभयो । कार्यक्रममा अधिकाशं महिला सहभागि छन् । तालिममा अस्मीता नेपाली , सर्मिला दराइ , महिमा मगर , सपना कंडेलले सहजीकरण गर्नुभएको थियो ।
कावासोती नगरपालिकाको आयोजनामा भएको एक हप्ते तालिमको समापन कार्यक्रम वडा नं. २ का अध्यक्ष एवम् आर्थिक समिती संयोजक पौडेलको अध्यक्षतामा भएको हो । कार्यक्रममा वडा सदस्यहरु सपना विश्वकर्मा , भुमा पुन , शिव पाण्डे , झमानसिंह कानुङ वडा सचिव धनमाया ज्ञवाली , शिव सामुदायिक वनका व्यवस्थापक ईन्दिरा न्यौपाने लगायतको सहभागिता रहेको थियो ।
