कावासोती । बजार क्षेत्रमा कुनै आगलागिका घटना घट्यो भने दमकललाई पानी खोज्दै खोला तिर जानुपर्ने बाध्यता रहेको छ । नजिकै पानी भर्न मिल्ने कुनै श्रोत नहुदा समयमा आगलागि नियन्त्रण गर्न नसकि थप क्षती हुने खतरा रहेको छ । दमकललाई पानि भर्न मिल्ने गरि ‘फायर हाइड्रेन्ट ’ नहुदा आगलागिका कुनै घटना घटे समस्या पर्ने देखिएको छ ।
नवलपरासी (बर्दघाट सुस्तापूर्व) नवलपुरका मुख्य बजारक्षेत्रमा फायर हाइड्रेन्ट बनाईएको छैन् । जिल्लाको सदरमुकामको रुपमा रहेको कावासोतीमा समेत फायर हाइड्रेन्ट छैन । यस अघि कावासोतीको फलफुल चोकमा एउटा ‘फायर हाइड्रेन्ट ’ रहेको थियो । तर यो प्रयोग विहिन बनेको थियो । धेरै वर्ष पहिले निर्माण गरिएकाले जिर्ण बनेको ‘फायर हाइड्रेन्ट ’ प्रयोग विहिन बनेको थियो । अहिले उक्त ‘फायर हाइड्रेन्ट’ नारायणगढ बुटवल सडक विस्तारका क्रममा बाटोमा पर्ने भएपछी उखालिएको छ ।
दमकललाई पानी भर्न मिल्ने गरी प्रविधि जडान गरिनुलाई ‘फायर हाइड्रेन्ट’ भनिन्छ । ‘फायर हाइड्रेन्ट’बाट दमकलका लागि सहज रुपमा पानी निकाल्न सकिने हुदा बजार क्षेत्रमा कुनै आगलागिका घटना घटे समयमा नियन्त्रणमा लिन सकिन्छ । बजार क्षेत्रको नजिक कमै मात्र खुल्ला पानीका श्रोत हुन्छन् । यसकारण फायर हाइड्रेन्ट बनाउनु अति आवश्यक हुन्छ ।
कावासोतीमा चाडै फायर हाइड्रेन्ट निर्माण गरिने कावासोती खानेपानी तथा सरसफाई उपभोक्ता संस्थाका अध्यक्ष भिमलाल कडेंलले बताउनुभयो । खानेपानीले डिपिआर तयार गर्दै गरेको र बजार क्षेत्रमा कहाँ कहाँ राख्न उपयुक्त देखिन्छ सो क्षेत्रमा फायर हाइड्रेन्ट राखिन अध्यक्ष कडेंलले बताउनुभयो । ‘हामिले हाम्रो सामाजिक उत्तरदायित्वको रुपमा लिएका छौ, कावासोतीमा करिब ८ देखी १० स्थानमा ‘फायर हाइड्रेन्ट’ बनाउने छौं’ अध्यक्ष कडेंलले भन्नुभयो–करिब ६ महिना सम्ममा बनाउने योजना छ ।
कावासोती बजार क्षेत्रमा कुनै आगलागिका घटना घटे समयमा दमकलको सहायतामा पानी निकाली आगोबाट हुने क्षती न्यूनिकरण होस भनेर आफ्हरुले यसको योजना बनाउएको अध्यक्ष कडेंलले बताउनुभयो ।
प्रगतिनगर खानेपानी तथा सरसफाई उपभोक्ता संस्थाले देवचुलीका चार स्थानमा ‘फायर हाइड्रेन्ट’ निर्माण गरेको छ । दुई स्थामा बोरिङ्गबाट सहज रुपमा पानी निकाल्न मिल्ने गरि ‘फायर हाइड्रेन्ट’को रुपमा विकास गरिएको संस्थाका अध्यक्ष खिमानन्द भुषालले बताउनुभयो । आफुहरुले अनिवार्य बनाउनुपर्छ भन्ने नभएपनी सामाजिक उत्तरदायित्वको रुपमा यसको निर्माण गरेको उहाँले बताउनुभयो । ‘फायर हाइड्रेन्ट’ निर्माण पछि प्रयोगमा समेत ल्याईएको र यसले आगोलागिबाट हुने क्षती न्यूनिकरणमा सहयोग पुगेको अध्यक्ष भुषालले बताउनुभयो । ‘फायर हाइड्रेन्ट’ नहुदा दमकललाई खोला तिर पानी खोज्न जानुपर्थ्यो, अहिले यही भएको छ ,केही मिनेट चाडै पानी भर्दा समेत धेरै क्षती न्यूनिकरणमा यसले सहयोग पुर्याउछ’ अध्यक्ष भुषालले भन्नुभयो ।
जिल्ला विपद व्यवस्थापन समिति , स्थानीय तहका विपद व्यवस्थापन समिति मार्फत यस विषयमा चासो दिनुपर्ने भएपनी यसो हुन भने सकेको छैन् । राजमार्ग संग जोडिएका नवलपुरका धेरै बजार क्षेत्रहरुमा अझै पनि फायर हाइड्रेन्ट बन्न सकेका छैनन् । यसमा स्थानीय तहले समेत चासो दिन आवश्यक रहेको बजार क्षेत्रका बासिन्दाको भनाई रहेको छ ।
(नवलपुर प्रेसमा प्रकाशित समाचार अनुमति बिना प्रयोग गरेमा कानून अनुसार कारवाही प्रक्रियामा जान बाध्य हुने छौं )
