स्थानीय तहका कार्यालय भवन धमाधम निर्माण हुँदै

कावासोती ।

पूर्वी नवलपरासीका केहि स्थानीय तहमा कार्यालय भवन निर्माण धमाधम भईरहेको छ ।
जिल्लाको कावासोती , मध्यविन्दु नगरपालिका र हुप्सेकोट गाउँपालिकाले सुविधा सम्पन्न आधुनिक भवन निर्माण गरिरहेका छन् । कावासोती नगरपालिकाको भवन निर्माण कार्य अन्तिम चरणमा पुगेको छ । भुमिगत एक तला सहित तीन तले आधुनिक भवन निर्माण गरिएको छ । व्यापारिक प्रयोजनका लागि दुईवटा तला भाडामा दिने, भुमिगत एक तलालाई पार्कि¨का रुपमा प्रयोग गर्ने र बाँकी ३ तला नगरपालिकाको कार्यालय र नगरपालिकाभित्र रहेका विषयगत कार्यालयहरू रहने गरी ६ तले भवन डिजाइन गरिएको भए पनि आर्थिक अभावका कारण अहिले तीन तला मात्र बनाईएको नगरपालिकाका अर्किटेक ईन्जिनियर पवन रुपाखेतीले जानकारी दिनुभयो । उहाँका अनुसार तीन तले भवन निर्माणका लागि करीब १३ करोड रुपियाँ खर्च भएको छ । २०७८ असार मसान्तभित्र निर्माण सक्ने गरी ह्याभिट्याट ड्रागन जेभि निर्माण कम्पनीले ठेक्का लिएको उक्त भवन निर्माण कार्य दुई महिना अघि नै पुरा भएको हुने रुपाखेतीले बताउनुभयो । आउदो वैशाख महिनामा नगरपालिकालाई हस्तान्तरण गर्ने तयारीमा रहेको छ । प्रदेश र स्थानीय तहको बजेटमा भवन निर्माण भएको हो ।
कावासोती नगरपालिकाको कार्यालय भवन अभाव हुँदा अहिले नगरपालिका मातहतको स्वास्थ्य, कृषि, पशु सेवा जस्ता सेवा तथा शाखा कार्यालयहरू नगरपालिकाको कार्यालयभन्दा बाहिरस्थापना गरेर राख्नुपरेको अवस्थामा भवन निर्माण सम्पन्न भएपछि एकै ठाउँमा कार्यालयहरू राख्न सकिने छ ।
यस्तै मध्यविन्दु नगरपालिकाको भवन समेत निर्माण सम्पन्न भएको उपप्रमुख ओम कुमारी महतोले जानकारी दिनुभयो । चार तले आधुनिक भवनमा अर्को वर्ष २०७८ सालको वैशाखमा कार्यालय सार्ने महतोले बताउनुभयो । तीन वर्ष अघि निर्माण कार्य सुरु भएको भवन प्रदेशको १ करोड ५० लाख रुपियाँ र बाँकी स्थानीय तहको गरेर करीब ६ करोड रुपियाँ लागमा निर्माण सम्पन्न गरिएको महतोले जानकारी दिनुभएको छ । अहिलेको भवनमा मातहतका सबै शाखा र फाँटहरुका लागि कार्यालय कोठा समेत आवश्यकता अनुसार नहुँदा कार्यसम्पादनमा समेत असहज भईरहेकाले नयाँ भवनबाट सेवा प्रवाह सुरु गरेपछि यस समस्या समाधान हुने महतोको भनाई छ ।

यस्तै जिल्लाको हुप्सेकोट गाउँपालिकाले समेत आधुनिक भवन निर्माण गरिरहेको छ । भवन निर्माणको करीब ६० प्रतिशत काम सम्पन्न भएको गाउँपालिकाका ईन्जिनियर विनोद अर्यालले जानकारी दिनुभयो । प्रदेश सरकार र स्थानीय सरकारको ५०÷ ५० प्रतिशत लागत गरि करीब ९ करोड रुपियाँ लागतमा साढे तिन तले भवन निर्माण गर्ने गरि काम सुरु गरिए पनि पहिलो चरणमा पहिलो तलाको काम सम्पन्न भएपछि दोश्रो चरणको काम पुनः टेन्डर गरेर गरिने अर्यालले बताउनुभयो । बहुवर्षे योजना अन्तरगत निर्माण सुरु गरिएको भवनको पहिलो तला निर्माणका लागि २ करोड १३ लाख रुपियाँमा ठेक्का दिईएको अर्यालेले जानकारी दिनुभयो । उहाँका अनुसार आउदो असारसम्म पहिलो तला सम्पन्न गर्ने सम्झौता छ ।
नोटः फोटो कावासोती नगरपालिकाको निर्माणधीन भवनको फोटो छ ।