संसद बैठकको यस्तो छ कार्यसूचि , एमाले र माओवादी केन्द्रलाई छुट्टाछुट्टै बस्ने व्यवस्था

काठमाडौं । संसद सचिवालयले नेकपा एमाले र माओवादी केन्द्रलाई छुट्टाछुट्टै बस्ने व्यवस्था मिलाएको छ। नेकपा खारेज भएको सूचना प्राप्त भएपछि संसद सचिवालयले आजको बैठकमा नेकपा एमाले र माओवादी केन्द्रलाई छुट्टाछुट्टै बस्ने व्यवस्था मिलाएको हो।
प्रतिनिधिसभाका सचिव गोपालनाथ योगीले निर्वाचन आयोगको पत्र प्राप्त भएकाले दुवै पार्टीलाई छुट्टाछुट्टै लहरमा बस्ने व्यवस्था मिलाइएको बताए।

छुट्टै दल भएपनि माओवादी केन्द्र अहिले पनि सत्ता पक्ष नै भएकाले एमालेका सांसदहरु बस्ने नजिकै अर्को लहरमा छुट्टै बस्ने व्यवस्था मिलाइएको योगीले बताए।  बैठक आज दिउँसो १ बजे बस्ने छ।

जसमा ७ वटा अध्यादेश टेबुल गर्ने सम्भावित कार्यसूची तय गरिएको संसद सचिवालयले जनाएको छ। यसअघि यही फागुन २३ गतेको पहिलो बैठकमा सरकारले संवैधानिक परिषद्सम्बन्धी अध्यादेश पेस गर्दा फिर्ता लिन माग गर्दै प्रमुख प्रतिपक्षी दल नेपाली कांग्रेसले बैठक अवरुद्ध पारेको थियो। तत्कालिन प्रचण्ड–नेपाल पक्षका सांसदले पनि बैठक बहिष्कार गरेका थिए।

जसका कारण सभामुख अग्नि सापकोटाले बैठक आजका लागि सूचना टाँसेर स्थगित गरेका थिए। अध्यादेशविरुद्ध विरोधको सूचना दर्ता भइसकेकाले आजको संसद बैठक प्रक्रियामा अघि बढ्ने काँग्रेस संसदीय दलकी सचेतक पुष्पा भुषालले जानकारी दिइन। भुषालसहित माओवादी केन्द्रका यशोदा सुवेदी, टेकबहादुर बस्नेत, दुर्गाकुमारी विक, सन्तकुमार थारु तथा जनता समाजवादी पार्टीका लक्ष्मणलाल कर्ण र मोहम्मद इस्तियाक राइले अध्यादेश खारेजीको माग गर्दै विरोधको सूचना दर्ता गराएका छन्। विरोधको सूचना दर्ता भएपनि आजको बैठकको संभावित कार्यसूचीमा त्यसलाई राखिएको छैन।

तेजाब तथा अन्य घातक रासायनिक पदार्थ नियमन, यौन हिंसाविरुद्धका केही ऐनलाई संशोधन गर्नेलगायत सातवटा अध्यादेश पेश हुनेछन् । मन्त्रिपरिषद्को सिफारिसमा राष्ट्रपतिबाट जारी गरिएका अध्यादेश जारी भएको ६ महिनाभित्र संसदबाट पारित गर्नुपर्ने संवैधानिक व्यवस्था छ। यस्तै आजको कार्यसूचीमा पूर्व तथा बहालवाला गरी १४ सांसदको निधनमा शोक प्रस्ताव प्रस्तुत गर्ने कार्यसूची पनि रहेको संसद सचिवालयले जनाएको छ।