ज्ञानु पंगेनी । कावासोती । १ सय ११ औँ अन्तराष्ट्रिय नारी दिवस नवलपरासी पूर्व (नवलपुरको) कावासोतीमा विभिन्न प्रतियोगिता , सम्मान , र्याली र अभिमुखीकरण कार्यक्रम गरेर मनाईने भएको छ ।
मंगलबार कावासोती नगरपालिकामा बसेको सरोकारवालाको वैठकबाट नारी दिवसको अवसर पारेर यहि फागुन २२ र २३ गते दुईदिनसम्म कार्यक्रम गर्ने निर्णय गरेको हो ।
फागुन २२ गते विभिन्न महिला सहकारी र महिला संघसंस्थामा आबद्ध महिलाहरुको खुला महिला समूह बक्तृत्वकला प्रतियोगिता र कक्षा ९ देखि १२ सम्मका विद्यार्थीहरुकोे निबन्ध लेखन प्रतियोगिता गर्ने निर्णय गरिएको कावासोती नगरपालिका प्रमुख चन्द्र कुमारी पुनले जानकारी दिनुभयो । फागुन २२ गते आयोजना हुने निबन्ध लेखन प्रतियोगिता र बक्तृत्वकला प्रतियोगिता कावासोती खानेपानीको सभाहलमा बिहान ११ बजेबाट सुरु हुने पुनले बताउनुभयो । प्रतियोगिता कावासोती नगर स्तरीय हुने छ । निबन्ध लेखन प्रतियोगिता र बक्तृत्वकला प्रतियोगिताको शिर्षक यस वर्षको नारी दिवसको राष्ट्रिय नारा महिलाको सुरक्षा , सम्मान र रोजगारःसमृद्ध नेपालको आधार भन्ने रहेको छ ।
यस्तै फागुन २३ गते मूल समारोह आयोजना गरिने छ । बिहान ११ बजे कावासोती नगरपालिकाको प्राङगणमा भेला भएर ब्यानर र प्ले कार्ड सहित सितारा रिसोर्टमा पुगेर समारोहमा परिणत हुने छ । उक्त कार्यक्रममा महिला सहकारी , महिला पत्रकार र नमुना महिला उद्यमीलाई सम्मान कार्यक्रम गरिने पुनले जानकारी दिनुभयो ।
यस्तै सोहि दिन जिल्ला प्रहरी कार्यालयबाट साईबर सेफ्टी सम्बन्धि अभिमुखीकरण कार्यक्रम समेत प्रदान गरिने छ ।
वैठकबाट कार्यक्रम सफल पार्नका लागि विभिन्न उपसमिती समेत गठन गर्ने निर्णय गरिएको छ । आर्थिक व्यवस्थापन उपसमिती , र्याली व्यवस्थापन उपसमिती , मञ्च व्यवस्थापन उपसमिती , प्रचारप्रसार उपसमिती , निबन्ध लेखन व्यवस्थापन उपसमिती र बक्तृत्वकला प्रतियोगिता व्यवस्थापन उपसमिती गठन गर्ने निर्णय गरिएको छ । फागुन २४ गते नारी दिवसको दिन संघसंस्था आफैले विभिन्न कार्यक्रम गरेर दिवस मनाउने निर्णय गरिएको छ ।
कावासोती नगरपालिका प्रमुख चन्द्र कुमारी पुनको अध्यक्षता तथा प्रमुख जिल्ला अधिकारी मनमाया पंगेनीको प्रमुख आतिथ्यतामा वैठक भएको थियो । कार्यक्रममा बोल्दै प्रजिअ पंगेनीले सबै मिलेर कार्यक्रमलाई सफल बनाउन आग्रह गर्नुभयो । वैठकमा कावासोती नगरपालिका प्रमुख प्रशाशकीय अधिकृत रमेश घर्ती , शिक्षा अधिकृत राजन पाण्डे , श्रोत शिक्षक तिर्थ कंडेल , जिल्ला प्रहरी कार्यालय महिला बालबालिका तथा जेष्ठ नागरिक सेवा केन्द्र ( महिला सेल ) प्रमुख विन्दु बि.क , पत्रकार , कावासोतीमा रहेको विभिन्न महिला सहकारी , महिलाको क्षेत्रमा काम गर्ने गैह्र सरकारी संस्थाका प्रमुख तथा प्रतिनिधी लगायतको सहभागिता रहेको थियो । कार्यक्रममा कावासोती नगरपालिका महिला तथा बालबालिका शाखा प्रमुख शुसिला तिमिल्सीनाले सहजीकरण गर्नुभएको थियो ।
