पोखरा । प्रधानमन्त्री केपी शर्मा ओली आज पोखरा आउँदैछन् । व्यस्त कार्यतालिकामा पोखरा आउन लागेका ओलीले गण्डकी प्रदेशस्तरीय कार्यकर्ता भेलालाई सम्बोधनसहित, प्रदेश प्रशिक्षण प्रतिस्ठानको शिलान्यास र पोखरा रंगशालाको निरीक्षण गर्नेछन् ।
प्रधानमन्त्री ओली ११ बजे पोखरा आइपुग्ने र लगत्तै गण्डकी प्रदेश सरकारले निर्माण गर्ने प्रदेश प्रशिक्षण प्रतिष्ठानको शिलान्यास गर्ने कार्यक्रम छ । पोखरा–१ नदीपुरमा बन्न लागेको प्रशिक्षण प्रतिष्ठान शिलान्यासपछि उनले कार्यकर्ता भेलालाई सम्बोधन गर्नेछन् । कार्यकर्ता भेला पोखरा सभागृहमा हुने तय छ ।
‘शिलान्यास कार्यक्रमपछि सिधैं प्रधानमन्त्री ज्यु सभागृहमा आउनुहुनेछ । त्यहाँ उहाँले सभागृह १ बजे कार्यकर्ता सम्बोधन गर्नुहुनेछ,’ नेकपा कास्कीका अध्यक्ष तथा प्रदेश सांसद कृष्ण थापाले भने, ‘कार्यक्रमका लागि हाम्रो तयारी पूरा भइसकेको छ ।’
कार्यकर्ता सम्बोधनपछि प्रधानमन्त्रीले पुनर्निमाण अन्तिम चरणमा पुगेको पोखरा रंगशाला निरीक्षण गर्ने राष्ट्रिय खेलकुद परिषद् (राखेप)का गण्डकी प्रदेश सदस्य सचिव केशव सिलवालले जानकारी दिए । ‘त्यहाँ प्रधानमन्त्री ज्युले रंगशालामा भइरहेको पूर्वाधार निर्माण र नवौं राष्ट्रिय खेलकुदको तयारीबारे जानकारी लिनुहुनेछ,’ उनले भने । उनी २ बजे रंगशाला निरीक्षण गर्नेछन् ।
प्रधानमन्त्री ओलीले पोखरा रंगशाला जाने कार्यक्रम तय भएपछि सुरक्षा व्यवस्था र तयारीबारे गण्डकी प्रदेशका मुख्यमन्त्री पृथ्वीसुब्बा गुरुङ, जिल्ला प्रशासन कार्यालय कास्कीका सिडिओ थानेश्वर गौतम लगायतले निरीक्षण गरेका छन् ।
प्रधानमन्त्री ओलीको स्वागतका लागि पोखरा रंगशाला तयार भइसकेको राष्ट्रिय खेलकुद परिषद्का सदस्य राजेश गुरुङले ‘बिफ्रिङ’ गरे । उनले भने, ‘पोखरा रंगशालामा सरसफाई सहित स्वागतद्धार निर्माण लगायतका काम सम्पन्न भइसकेको छ ।’
पोखरा रंगशालामा खेलाडीहरुले आ–आफ्नो खेल पोशाकसहित प्रधानमन्त्रीको स्वागत गर्नेछन् ।
