कावासोती । पूर्वी नवलपरासीको कावासोती नगरपालिका – १६ डण्डा बजार क्षेत्र फोहोरले कुरुप र दुर्गन्धीत बनेको सर्वसाधारणले गुनासो व्यक्त गरेका छन् ।
सदरमुकाम समेत रहेको कावासोती नगरपालिकाको मुख्य बजार क्षेत्र डण्डा बजार क्षेत्रमा पलाष्टिक , कागज , फलफुल , हाटबजार तथा किराना पसलबाट निस्किएको फोहोरजन्य वस्तुहरु यत्रतत्र छरपष्ट रुपमा फालिदा बजार नै कुरुप बनेको स्थानीय रेनु पाण्डेले गुनासो व्यक्त गर्नुभयो । अमलटारी होम स्टे तथा नारायणी नदी किनारमा रहेका विभिन्न पर्यटकीय क्षेत्रमा प्रवेश गर्ने प्रवेशद्धारका रुपमा रहेको डण्डा बजारको फोहोरका कारण बाहिरबाट आउने पर्यटकमा समेत नकारात्मक शन्देस जाने उहाँले बताउनुभयो । फलफूल बजार, हाट बजार र सवारी पार्किङ्गका कारण बजार क्षेत्रमा फोहोर बढि हुने गरेको उहाँले बताउनुभयो । त्यसपछि दायाँबाँया रहेका पसल , होटेल व्यवसायबाट निस्कने फोहोर रहेको पाण्डेले बताउनुभयो ।
डण्डाबाट नारायणगढ , हुप्सेकोट र तल्लो क्षेत्रमा सवारी छुट्ने गर्दछ । ती सवारी डण्डा बजारमा पार्किङ्ग हुने गरेका छन् । ती सवारीका चालक सहचालकले सूर्तीजन्य पदार्थ सेवन गरेर जथाभावि फाल्ने र यात्रु समेतले जङ्क फुडका पलाष्टिकजन्य वस्तु जथाभावि फाल्ने गरेका छन् । जसका कारण बजार कुरुप बनेको स्थानीय सीता न्यौपानेले बताउनुभयो । फलफूल पसल संचालन गर्नेहरुले समेत आफ्नो वरपर आफैले गरेको फोहोर समेत सफा नगर्ने , कुहिएका फलफूल र बोक्रा जथाभावि फाल्ने , हाट बजार लागेपछि सफा गर्ने परिपाटी नहुँदा फोहोर र दुर्गन्ध भएको न्यौपानेको भनाई छ ।
कावासोती नगरपालिकाले बजार क्षेत्रमा फोहोर व्यवस्थापनका लागि नियमित रुपमा फोहोर संकलन गर्दै आएको छ । बजारमा छरप्रष्ट छरिएको फोहोर आसपासका बासिन्दा र व्यवसायीले सरसफाई गरेर फोहोर संकलन गर्ने सवारीमा राख्दिने हो भने , बजार क्षेत्र सफा हुने न्यौपानेले बताउनुभयो । तर , आफैले गरेको फोहोर समेत सफा नगर्ने परिपाटीले गर्दा बजार कुरुप बन्न पुगेको सर्वसाधारणको आरोप छ ।
डण्डा बजार बजार व्यवस्थापन समितिका सचिव पदम वहादुर चन्दका अनुसार समितिले पटक – पटक व्यवसायी र सवारीका चालक सहचालकलाई जथाभावि फोहोर नफाल्न, एक ठाउँमा जम्मा गरेर राख्न आग्रह गरे पनि अटेरी गर्ने गरेको बताउनुभएको छ । फोहोर संकलनका लागि डस्विन समेत राखेपनि त्यसको प्रयोग नगरिदिदा समस्या भएको उहाँको भनाई छ । बजारलाई स्वच्छ र सफा राख्ने चाहाना समितिको रहँदा रहँदै पनि भनेको नसुन्दा बजार फोहोर भएको उहाँ बताउनुहुन्छ । बजार क्षेत्र सरसफाई राख्न आफुहरुले पहल गर्ने उहाँले बताउनुभएको छ ।
